ДТМ 2013/2014 ўқув йилида ўзбекистонлик талабалар камида неча балл билан ўқишга кирганини маълум қилди

Ўзбекистон Давлат Тест маркази 2013/2014 ўқув йили учун ўртача ўтиш балларини эълон қилди, дея хабар бермоқдаDaryo.Uz.

Ўтиш баллари билан танишиш учун ДТМ сайтидаги махсус саҳифага (бу ерда) кириш ва у ердан тегишли олий таълим муассасасини танлаш керак.

Шунда бутун бир ОТМ бўйича ҳар бир факультетга қанча абитуриент ҳужжат топширгани, танлов кўрсаткичи, қабул режаси, шунингдек, давлат гранти ва тўлов-шартнома асосида ўқишнинг ўтиш баллари келтирилган жадвал очилади.

ДТМ маълумотларига кўра, хусусан, Ўзбекистон Миллий универтетидаги энг юқори ўтиш баллари, анъанавий равишда, ижодий имтиҳони ҳам бўлган журналистика факультетида кузатилган (грантга – 242,99 балл, контрактга – 201,43 балл). Шунингдек, миллий ғоя, маънавият асослари ва ҳуқуқ таълими йўналиши бўйича бешта грант ўрнига ўтиш баллари камида 215дан паст бўлмаган.

Тошкент тиббиёт академиясининг энг кўп абитуриент (2 минг 746) ҳужжат топширган даволаш иши ўқув йўналишида контрактга ўтиш балли 169,82, грантга эса 198,21 баллни ташкил этган. Ариза қабул бўйича иккинчи бўлган йўналиш – стоматологияда эса контрактга ўтиш 175,06, грантга ўтиш 208,48 бўлиб, бу умуман Академиядаги энг юқори кўрсаткичлардир.

Эслатиб ўтамиз, 2013/2014 ўқув йилида ОТМда ўқиш учун ариза топширган абитуриентлар сони бўйича рекорд ўрнатилган, олий таълим муассасасидаги 56,6 мингдан ортиқ ўрин учун 480 мингдан ортиқ ариза топширилган эди.