Россиянинг «Лента.Ру» нашрида бош муҳаррир ўзгарди

Россиянинг «Лента.ру» интернет-нашри бош муҳаррири Галина Тимченко истеъфога чиқарилди. Бу ҳақда қарор, Тимченконинг нашр таҳририятига маълум қилишича, «Афиша-Рамблер-SUP» бирлашган компанияси эгаси Александр Мамут томонидан қабул қилинган.

Галина Тимченко 2004 йилдан бери «Лента.ру»га бош муҳаррирлик қилиб келаётган эди. Унинг раҳбарлигида интернет-нашр Россиядаги ва жаҳондаги ижтимоий-сиёсий воқеаларни ёритиб борувчи Россиянинг бош ахборот ресурсига айланди (ташрифлар сони бўйича ҳам етакчиликни қўлга олганди). Украинадаги воқеалар вақтида «Лента.ру» мунтазам равишда ҳодиса жойидан репортаж ва интервьюлар эълон қилиб борди.

12 мартдан эътиборан Алексей Гореславский «Лента.ру»нинг янги бош муҳаррири этиб тайинланган. У бунгача «Интерфакс» ахборот агентлигининг интернет-лойиҳалари билан шуғулланган ва Кремль-тараф дея таърифланган «Взгляд.ру» интернет-нашри бош муҳаррири сифатида ишлаган. «Лента.Ру»га келгунча бирлашган компаниянинг ташқи коммуникациялар бўйича бош директор ўринбосари сифатида ишлаб келаётган эди.

Галина Тимченко 1999 йилда ишга тушган «Лента.Ру»нинг дастлабки ходимларидан бири эди. У нашрда 1999 йилдан бери ишлар, 2004 йилдан эса интернет-нашр бош муҳаррири сифатида фаолият олиб бораётган эди.

Тимченконинг истеъфога чиқарилиши интернет-нашр таҳририяти томонидан салбий кутиб олинди. 12 март куни таҳририят ходимлари нашр ўқувчиларига мурожаат қилиб, янги бош муҳаррир тайинланишини нашрга нисбатан бевосита босим дея таърифлашган ва янги бош муҳаррир қўл остида ишлаш ниятлари йўқлигини маълум қилишган.

«Сўнгги икки йил ичида Россиядаги эркин журналистика майдони драматик тарзда қисқариб борди. Бир қатор нашрлар бевосита Кремль томонидан бошқарилмоқда, бошқалари эса – кураторлар орқали, учинчилари эса – ишини йўқотишдан қўрқадиган муҳаррирлар томонидан. Бир қатор ОАВлар ёпилди, яна бошқалари яқин ойлар ичида ёпилади. Фожеа – биз энди қаерда ишлаймиз, деган масалада эмас. Фожеа шундаки, сизда энди ўқишга арзигулик ҳеч нарса қолмайдиган кўринади. Биз, сўзсиз, бизнинг ортимиздан ҳам келишларини билгандим. Ишонамизки, ҳар доим ҳам шундай бўлиб қолавермайди», – дейилади 70га яқин «Лента.Ру» ходими имзо чеккан мурожаатда.