Малайзиянинг йўқолган «Боинг»и Хитой сунъий йўлдоши кўрсатган жойдан топилмади

Вьетнам томонидан ўтказилган қидирув операцияси вақтида Хитой сунъий йўлдоши томонидан кўрсатилган жойда Malaysia Airlines «Боинг»и қолдиқлари топилмади. Бу ҳақдаReuters ахборот агентлиги хабар бермоқда.

Қайд этишларича, Вьетнам ҳарбий ҳаво кучларининг икки қидирув самолёти Хитой сунъий йўлдоши томонидан кўрсатилган ҳудудни икки марта айланиб, текшириб ўтган ва йўқолган самолёт билан боғлиқ бирорта объектни топмаган.

Ўз навбатида, Хитой сунъий йўлдоши кўрсатган жойда Малайзия «Боинг»и топилмагани ҳақидаги хабарни Малайзия авиацияси раҳбари ҳам тасдиқлаган, дея хабар бермоқда Associated Press.

Аввалроқ, Хитой сунъий йўлдоши Malaysia Airlines авиакомпаниясининг ўтган ҳафта йўқолган самолёти тахминан қулаган жойда бир қатор «шубҳали объектлар»ни топгани ҳақидахабар берилган эди.

Manba: kun.uz