Ўзбекистонда интернет тезлиги 2013 йил июлига нисбатан секундига салкам 1,5 мегабитга секинлашди

Март ойи якунларига кўра, Ўзбекистондаги интернет тезлиги ўртача секундига 2,33 мегабитни ташкил этди. Net Index Explorer маълумотларига кўра, ушбу кўрсаткич билан Ўзбекистон жаҳоннинг 190 мамлакати орасида 174-ўринни эгаллаб турибди.

Net Index маълумотларига кўра, кўчириб олиш тезлиги бўйича Ўзбекистонда энг яхши кўрсаткич Ucell’га тегишли – секундига 9,59 мегабит. Turon Telecom (6,19 мегабит), Uzonlayn (5,31 мегабит), «Билайн-Ўзбекистон” (2,87 мегабит) ва Sharq Telekom (2,44 мегабит) каби интернет-сервис провайдерлар ва операторлар ҳам интернет тезлиги яхшилар қаторига кирган.

Қайд этиш жоиз, 2013 йилнинг 4 апрелидан 2014 йилнинг 3 апрелигача бўлган оралиқда Ўзбекистон интернет тезлиги бўйича жаҳон мамлакатлари орасида 171-ўринни эгаллаб турибди. Унга кўра, Ўзбекистонда интернетдан кўчириш тезлиги секундига 2,4 мегабит, юклаш тезлиги 2 мегабит, мобил интернетда кўчириш тезлиги 1,6 мегабит, юклаш тезлиги эса 0,5 мегабитга тенг.

Ўтган бир йил ичида энг юқори тезлик, Net Index маълумотларига кўра, 2013 йилнинг июль ойида кузатилган бўлиб, ўшанда тезлик секундига 3,73 мегабитга етган, бу эса 190 мамлакат орасида 135-ўринни эгаллаш имконини берганди.

Таққослаш учун, сўнггги бир йиллик натижалар бўйича, Қозоғистон 56- (тезлик – 13,83 мегабит), Қирғизистон 81- (9,35 мегабит), Тожикистон 68- (11,28 мегабит), Озарбайжон 142-ўринни (4,31 мегабит) эгаллаб турибди.

Умумий рейтинг бўйича энг тез интернет Гонгконгда (75,46 мегабит), шунингдек, Сингапур (60,5), Руминия (57,73), Жанубий Корея (51,44), Швейцария (48,83), Андорра (44,79), Литва (42,26), Швеция (41,88), Япония (41,85), Голландия (40,7), Макао (40,09) ва Тайванда (40) 40 мегабитдан кам эмас.

Буюк Британияда интернет тезлиги 26,68 мегабитни ташкил қилса (24-ўрин), АҚШда 22,56 (36-ўрин), Россияда 22,17 (37-ўрин), Хитойда эса 18,24 мегабитга тенг (47-ўрин).

Қўшимча ўрнида, Ўзбекистон Алоқа, ахборотлаштириш ва телекоммуникациялар агентлиги маълумотларига кўра, 2014 йил январь ойи ҳолатига кўра, Ўзбекистоннинг халқаро интернет тармоғига уланиш тезлиги секундига 10,3 гигабитни ташкил қилади